កណ្ដាល៖ ព្រះមហាវិមលធម្ម មួង សុទ្ធាពុទ្ធពង្ស ចៅអធិការវត្តហរិរក្សរាជិនី (វាំងចាស់) និងជាព្រះវិន័យធម៌អនុគុណក្រុងឧដុង្គម៉ែជ័យបានចំរើនពរសម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ដែលបានប្រគេនទៀនព្រះវស្សា និងទេយ្យទានដល់ព្រះសង្ឃគង់ចាំព្រះវស្សាក្នុងវាំងចាស់ក្នុងឆ្នាំ២០២៣នេះ។

ទៀនព្រះវស្សា និងទេយ្យទានដែលសម្ដេចតេជោនិងសម្ដេចកិត្តិព្រឹទ្ធបណ្ឌិតចាត់ឲ្យក្រុមការងារយកទៅប្រគេនព្រះមហាវិមលធម្ម មួង សុទ្ធាពុទ្ធពង្ស នៅថ្ងៃទី៨ ខែកក្កដា ឆ្នាំ២០២៣ រួមមាន ទៀនព្រះវស្សាចំនួន ២គូរ ទឹកក្រូច និងទឹកបរិសុទ្ធចំនួន ១៥កេស ទឹកដោះគោខាប់ ២កេស កាកាវ ២កេស មៀនកំប៉ុង ២កេស ត្រីខ ២កេស មី ២កេសធំ តែចំនួន ៤គីឡូក្រាម ស្ករស ២០គីឡូក្រាម អង្ករ ១០០គីឡូ ប្រេង ២កាន និងថវិកា ចំនួន ៥លានរៀល។

មហាកុសលផលបុណ្យទាំងនេះបានឧទ្ទិសជូនដួងវិញ្ញាណក្ខន្ធមហាឧបាសក លីន គី និងអ្នកឧកញ្ញ៉ាព្រឹទ្ធមហាឧបាសិកាធម្មញ្ញាណវិវឌ្ឍនា ប៊ុន ស៊ាងលី (ត្រូវជាមាតា បិតាបង្កើត សម្តេចកិត្តិព្រឹទ្ធបណ្ឌិត) មហាសទ្ធាភិរ័ក្ខធម្មសិរីរតន៍ អគ្គមហាឧបាសិកាពុទ្ធសាសនូបត្ថម្ភ ប៊ុន សុថា អ្នកឧកញ្ញ៉ាមហាភក្តីសប្បុរសភោគាធិបតី ហ៊ុន នាង និងមហាឧបាសិកា ឌី ប៉ុក (ត្រូវជាមាតាបិតាបង្កើត សម្តេចអគ្គមហាសេនាបតីតេជោ) សម្ដេចឧត្តមទេពញាណ ហ៊ុន ណេង ព្រមទាំង កុមារាកូនប្រុស ហ៊ុន កំសត់ និងដួងវិញ្ញណក្ខន្ធ ជីដូន ជីតា និងញ្ញាត្តិការទាំងប្រាំពីរសន្តាន ដែលបានចែកឋានទៅកាន់បរលោក៕